انت ليه مش بتمسك ايدى ؟؟؟؟؟

" إ" إنت ليه مش بتمسك إيدى وإحنا ماشيين فى الشارع ؟؟؟ "
"لأ بلاش...افرضي حد من قرايبك شافنا؟ والا حد من أصحاب أخوكى فى الكلية ؟؟؟
إن شاء الله يا حبيبتى بكرة نتخطب وأمسك إيديكى قدام الدنيا كلها ".
------------
" إنت ليه مش بتمسك إيدى وإحنا ماشيين فى الشارع ؟؟؟ "
"علشان مش عاوز حد يفتكر إننا علشان إتخطبنا هنصيع بقى ونعيش
حياتنا ... وبعدين بصراحة كده أنا مستحرم ... إن شاء الله بكرة نتجوز وأمسك إيدك وإنتى مراتى
حبيبتى فى الحلال ".
-------------
" إنت ليه مش بتمسك إيدى وإحنا ماشيين فى الشارع ؟؟؟ "
" يا حبيبتى إحنا مش مراهقين بقى هنمسك إيد بعض فى الشارع وكده ... إحنا إتنين متجوزين ومحترمين وعندنا بيت نعمل فيه إللى عاوزين نعمله " .
------------
" إنت ليه مش بتمسك إيدى وإحنا ماشيين فى الشارع ؟؟؟ "
"يعني أمسك إيدك والا أمسك إيد البنت والا أشيل الأكياس دى كلها ؟! "
----------
" إنت ليه مش بتمسك إيدى وإحنا ماشيين فى الشارع ؟؟؟ "
" إيدك إيه بس إللى هامسكها دلوقتى ! إنتى عاوزه جوز بنتك يقول علينا كبرنا
وخرفنا وإحنا ماشيين فى الشارع ؟؟؟ "